नक्कली बोर्डिङ पास प्रयोग गरी विमानमा प्रवेश गरेका युवक पक्राउ

अमेरिकाको टेक्सासस्थित जर्ज बुस अन्तर्राष्ट्रिय विमानस्थलबाट लस एन्जलस जान लागेको युनाइटेड एयरलाइन्सको विमानमा नक्कली बोर्डिङ पास प्रयोग गरी प्रवेश गरेका एक युवक पक्राउ परेका छन्। २५ वर्षीय अब्दुलरहमान ओरियोमी विमानको शौचालयमा लुकेको अवस्थामा फेला परेका थिए। प्रहरीका अनुसार उनले सुरक्षा जाँच पार गरेपछि विमानमा चढ्न सफल भएका थिए र सुरुमा एउटा खाली सिटमा बस्ने प्रयास गरेका थिए। तर आफूलाई सिट नभएको थाहा पाएपछि उनी शौचालयमा गएर लुकेका थिए।

विमान उडानको तयारीमा रहेका बेला एक यात्रुले शौचालयमा कसैको असामान्य गतिविधि देखेपछि चालक दललाई जानकारी दिएका थिए। विमान परिचारिकाले जाँच गर्दा ओरियोमी फेला परेका थिए। उनले आफ्नो नाम “मिस्टर लोपेज” भएको बताएका थिए र पछि खाली सिट नपाएपछि चालक दलका लागि छुट्याइएको “जम्प सिट” मा बस्न अनुमति पनि मागेका थिए। जब विमानका कर्मचारीहरूले यात्रु सूची जाँच गरे, त्यहाँ उक्त नामका कुनै यात्रु नभएको पत्ता लाग्यो। त्यसपछि उनी अनधिकृत रूपमा विमानमा चढेको पुष्टि भएपछि विमान पुनः गेटमा फर्काइयो।अनुसन्धानका क्रममा ओरियोमीले ह्युस्टनबाट लस एन्जलस जाने टिकट बुक गरे पनि भुक्तानी नगरेकाले उनको आरक्षण रद्द भइसकेको पाइएको थियो। प्रहरीले जाँच गर्दा उनले प्रयोग गरेको बोर्डिङ पास नक्कली भएको आशंका गरेको छ। बोर्डिङ पासमा आवश्यक विवरणहरू नदेखिएको र क्यूआर कोड पनि बनावटी जस्तो देखिएको बताइएको छ। घटनापछि एफबीआई, विमानस्थल सुरक्षा निकाय र बम पत्ता लगाउने विशेष टोली घटनास्थलमा परिचालन गरिएको थियो र विमानको पूर्ण सुरक्षा जाँच गरिएको थियो।

यस घटनाका कारण उडान करिब तीन घण्टा ढिलो भएको थियो। ओरियोमीमाथि महत्वपूर्ण पूर्वाधार सञ्चालनमा अवरोध पुर्‍याएको गम्भीर अपराधको आरोप लगाइएको छ र उनी हाल १५ हजार अमेरिकी डलर धरौटीमा हिरासतमा रहेका छन्। पछिल्ला वर्षहरूमा अमेरिकामा यस्ता केही घटनाहरू दोहोरिएकाले विमानस्थल सुरक्षाको प्रभावकारितामाथि फेरि प्रश्न उठ्न थालेको छ।