कर्णाली स्वास्थ्य विज्ञान प्रतिष्ठानमा उपचारमा चिकित्सकीय लापरबाही भएको गम्भीर आरोप

जुम्लास्थित कर्णाली स्वास्थ्य विज्ञान प्रतिष्ठानमा उपचाररत डिकेशनाथ योगीको शनिबार, १६ अगस्त २०२५ मा निधन भएपछि उनका परिवारजनले उपचारमा चिकित्सकीय लापरबाही भएको गम्भीर आरोप लगाएका छन्। परिवारको दाबीअनुसार चिकित्सकहरूको लापरबाही र प्रतिष्ठानको कमजोर उपचार व्यवस्थापनका कारण यो दुखद् घटना भएको हो।यो घटनाको निष्पक्ष छानबिन गर्न शनिबार प्रतिष्ठान परिसरमा विभिन्न राजनीतिक दलका नेता, जनप्रतिनिधि, स्थानीय समाजसेवी र योगी परिवारका सदस्यहरूको उपस्थितिमा एक जिल्लास्तरीय छानबिन समिति गठन गरिएको छ। समितिको संयोजकमा जिल्ला समन्वय समितिका प्रमुख गौरिनन्द आचार्य चयन भएका छन्। समितिमा बद्रीनाथ योगी, रतननाथ योगी, विष्णुबहादुर महत, मीनबहादुर रावलसहित सात जना सदस्य रहेका छन्।उक्त समितिलाई कर्णाली स्वास्थ्य विज्ञान प्रतिष्ठानको समग्र उपचार व्यवस्थापनको अवस्था अध्ययन गरी विस्तृत प्रतिवेदन पेश गर्ने जिम्मेवारी दिइएको छ। साथै, बैठकमा पीडित परिवारलाई उचित राहत र क्षतिपूर्ति उपलब्ध गराउन प्रतिष्ठानले तत्काल पहल गर्ने र तीन दिनभित्र ठोस व्यवस्था मिलाउने निर्णय भएको छ।छलफलमा प्रमुख जिल्ला अधिकारी केदारनाथ शर्मा, नेकपा एमालेका केन्द्रीय सदस्य रतननाथ योगी, माओवादी केन्द्रका विष्णुबहादुर महत, स्थानीय जनप्रतिनिधि, चिकित्सकहरू र योगी परिवारका आफन्तहरू सहभागी थिए।